1. Arno Steffen ist einer von sieben Autoren, die wöchentlich im „Kölner Stadt-Anzeiger“ in einer kölschen Kolumne aktuelle Entwicklungen aufs Korn nehmen.

Köln – Mir sin vür e paar Daach bei einem vun dä neue Coronaspazierjäng durch et Veedel widder ens die kleine, joldene Stolperstein opjefalle. Dä Künsler Gunter Demnig hät Medde vun dä nüngzijer Johre en Kölle ahnjefange, personalisierte Messingstein met dä Name von NS Opfere en de paveierte Bürjersteije zwesche die andere Stein zo verläje, um domet ahn die Opfer vun dä Nazizick ze erinnere.

Ich wor domols esu bejeistert vun dä Aktion, dat ich tireck bei däm singer Agentur ahnjerofe han. Unser Huus wollt och metmaache un ich joov die Adress.

Nazis in der eigenen Wohnung

Noh drei Woche krät ich enne Röckrof. Mingem Wunsch künnt leider nit entsproche weede, weil ahn däm ahnjejovvene Wunnoot kein verschleppte Minsche jewunnt hädden udder bekanntjewäse wöre. Op ming erstaunte Reaktion hin kom die Jäjenfrooch, ov ich dann üvverhaup wöss wo ich dann doh wunne dät? Doh wör doch en dr Nazizick de Jauleitung jewääs. Un en dä Hüser hädden eh nur Nazibonze jewunnt – un doh wör jaranteed keiner vun verdrivve woode!

Beim Nohdenke kohm mer enne schrecklije Jedanke un et leef mer kalt dä Rügge eraf: De Nazis, die dat alles ze verantwote hatte, han he in dinger Wunnung jeläv, en dingem Schlofzemmer süns jet jemaat, en dingem Wunnzimmer dä Weihnachtsbaum opjestalt - Käätze han dozoh jefunkelt , unheimelije Leeder woote jesunge: Vun Jesse kohm di Art...

Alles schön sauber! Aber auch rein?

Nettischkeite enjepack för de Frau un Spellsaache för de Pänz. Un dobei jeodemp. Un jehos. Dä Dunss muss sich doch irjendwo affjelat han - op de Wäng ? Op däm Boddem? Op de Johre? Un vun dä Aura es nix en de Gadinge hängejeblevve? Keine brunge Knies op däm Jeländer em Trappehuus? Kein blinde Flecke em Speejel, nur enne duude Winkel em Narrativ? Alles widder schön sauber jemaat – ävver rein?

Wat mät mer dann en su enem Fall? Wat sät dä Esoterikbeauftragte? Hückzedaach deit mer alles met wiessem Sälv udder Weihrauch ussräuchere, dat sull jäjen et mieste helfe...ävver met dä Qualmerei hatte schon die Katholike kein Schangks jäjen dr Düüvel jehat.

Das könnte Sie auch interessieren:

Michael Hehn op Kölsch

Selvsverständliches schätz mer ehtz, wann et fählt

Merken

Ich jläuv, uns Famillich hät et mieste vun dä Aura, die he en däm Huus existiert hät, einfach övver die Johre schon verstoffwechselt, weg reflektiert , weg gelaach un befreit. Mer müsss de Hüser offen un fründlich mache. Et jeit nit öm et Verjesse vun däm Ahle – nur öm et Verjevve, för et Oppasse, dat sich nit de neue Jeister met däm ahle Lüfje neu beodeme losse.Ov met udder ohne Stolperstein vür der Düür: Mer müsse jeder dä Stolperstein sin; dohjäje halde, de Muul opmache jäje Unräch, för Freiheit, Liebe, Toleranz. Jäje alternative Fakte.

Wörterbuch

paveierte - gepflasterteWunnoot - Wohnortjeodemp - geatmetjehos - gehustetWäng - WändeSalv - SalbeSchangks - ChanceMuul - Mauljäje - gegen