Köln – Dat nennt mer Camping! Als Kölsche bes do dat jewent. Met dr Jlöhwing-fläsch trecke mer e Leeve lang noh'm ieskale Iesermaat, Poppesitzungskaate hamstere. Met Jaade-Schäselong campeere mer am Jeissbockheim, öm en Dauerkaat em Stadion avzestaube. Un mer waade jedöldig en dr Schlang för e Plätzche op nem Böötche, wenn Kölner Leechter sinn. Mer kenne dat.

Ich hatt mer lojischerwies e Kümpche Äädäppelsschlot jemaht, e Pittermännche op dr Schrievdesch jestallt, et Plümmo parat jeröck un mingem Mann Ääzezupp för drei Däch en de Köch jepack.

Dat eetste Kölsch zapp sich wie nevvebei

Mer hatte Strichspönche jetrocke, wer vun uns dat Dinge rocke soll. Ruckzuck hatt ich dat Nümmerche för Mamms Impftermin jewählt! Un tirektemang de Homepage in dä Läptopp erinjetackert. Mer Fraulück künne Multitasking wie Sau. Dat eetste Kölsch zapp' sich wie nevvebei. Uns Mamm weed dis Pingste nüngzech un dat sull die och fipsmunter weede. Janz ohne dat schäbbije Virus.

Noh drei Däch wor dä Äädäppelsschlot am Engk un ich e bissje möd. Jot, mer Kölsche drinke an Fasteleer nit bloß drei Däch am Stöck; ävver simmer ens ihrlich: Wenn de Veedelzöch kumme, am dritte Sondach, han de mieste Lück en klein Deef...Am fünften Dach - mingen Veilchensdinsdach - hat ich e klein bissje met Agressione ze kämpfe. Als dä Ming in et Arbeitszimmer loore dät, wor ich jrad dä Läptop am aanbrülle: „Ich kumm dr jlich met der Petschzang, do Dresskanaille mit dinger rotzdreckelijjen Affstürzerei!! Ich bruch e Päusje un e Pinche - wä vun uns hätt dat am Veilchensdinsdach noh nit erläv!?“ Wenn do dä Nubbel verbrenne wellst, Schätzche, dann muss do dranblieve...

Wat sull ich üch sage: Zick e paar Däch han ich Koppping und Asche op dr Steen, denn mingen Impf-Äschermittwoch es ald lang vorbei. E Terminche för uns Mamm hammer immer noh nit. Fähler passere - ich jev nit op! Ävver die do bovve müsse ophüre, erumzelaveere met ihrer fuddelichen Impfstrategie.

Se dürve uns nit als knöll explizeere, eh mir dat eetste Pinche jekipp han. Wenn sich vun denne noch einer vür de Kamera stellt un verzällt, et wör super jelaufe - dä verfraachte ich eijenhändig op dä Strofesel am Nümaat! Un wenn mir noch einer säät, ich mööt vielleicht zwei- oder dreimol anroofe, eh ich ne Termin kreeje - dä kütt en de Weckschnapp!

Se kredenze de rettende Impfung för lau, dat es wohr un super; ävver wieso han die met dä Enladungsbreefe nit tirek Termine verschick? Oder wieso han die nit uns Kölnticket oder andere Ticketplattforme met dä Terminvergabe beopdragt? Die künne dat mit dä Dausenden un Aberdausenden vun Nohfroge am selve Dach. Die maache ihr Levve lang nix anderes! Un die sin och jrad komplett ohne Arbeid... Wieso jevve die nit sofort zo, dat et bedresse läuf, wenn et bedresse läuf? Do weiß jeder Bescheid un denk nit am Eng, hä persönlich wör ze blöd. Ihr Pappnase do!

Un wie maache mer jetz wigger?

E bessche mieh Bewäglichkeit em Kopp, dat darf man och en schwierije Zigge erwaade, dat es de Messlatt, ihr Schuumschläjer! Su - jetz simmer quitt! Un wie maache mer jetz wigger? Wie künne mer uns us dä Misere erusbrassele? Wat müsse mer dun, dat et flupp? Ich maach' met un do?