1. Walter Oepen ist Autor, Liedermacher, Kabarettist und Musiker, unter anderem im Krätzjer-Duo
2. „Oepens Schmal“ ist einer von mittlerweile acht Autoren, die wöchentlich für unsere kölsche Kolumne „loss jonn“ schreiben.
3. In dieser Folge schreibt er über die Erderwärmung, Wirbelstürme und Luftverschmutzung und wie jeder einen Beitrag für ein besseres Klima leisten kann.

Köln – Alles steiht om Kopp – wäje dem Klima! Johrzehntelang hammer uns enen Driss dodröm jekömmert, ovschüns schlaue Lück ald immer dovör jewarnt han. Erderwärmung? Hammer nix met am Hoot! Wirbelstürm? Sin en Amerika. Et Wasser weed knapp? Es en Afrika. Am Amazonas weed der Urwald avjefackelt? Alles wick fott!

Mer sin löstich wigger fünnefmol em Johr för e Wochenengk noh Malle jefloge, han wigger brung Kolle us der Ääd usjebuddelt un verbrannt, han öhntlich Diesel-SUVs jekauf un han sibbemol de Woch Fleisch jejesse.

Zur Person

Walter Oepen ist Autor, Liedermacher, Kabarettist und Musiker, unter anderem im Krätzjer-Duo „Quetsch un Flitsch“. 30 Jahre lang arbeitete er als Puppenspieler im Hänneschen-Theater, wo er unter anderem den Schäl spielte. „Oepens Schmal“ ist einer von mittlerweile acht Autoren, die wöchentlich im „Kölner Stadt-Anzeiger“ Texte für eine kölsche Kolumne „loss jonn“ schreiben. (fra)

Ävver jetz, wo mer et am eije Liev zo spöre krije, wo de Däch immer mih wäde, an denne mer an´t Jappe kütt, wo uns Bäum verdrüje un vun fiese Kevvere opjefresse wäde, wo der Rhing zom Duffesbaach weed un kein Scheff mih fahre künne, jetz schleiht uns ävver der Plaggen en!

Et Hüffsteak bliev em Hals steche

Ein pulitische Konferenz jach de nöhkste; de Jröne (vörher als „Verbotspartei“ jeschannt) jöcken et bei Wahle an CDU un SPD vörbei; et Thunbergs Jriet kotz sich op enem Bötche om Atlantik leever de Siel us dem Liev wie noh New York zo fleje; de Dieselautos solle nit mih durch et Städtche fahre dürfe. Un mer janz persönlich bliev et Hüffsteak em Hals steche, weil jo die Köh esu vill Methan en de Luff rülpse un futze. Wä weiß, wat noch all kütt! Vielleich baut dä blondeete Flappmann vun US-Präsident dämnöhks en 300 Meter huhe Moor an singer Ossküste, domet de Stürm nit ahn Land kumme. Et kütt noch esu wick, dat ich vör jedem Pippimaache üvverläje, ov dat en positive Klimabilanz hät!

Wörterbuch

brung Kolle - Braunkohlean et Jappe kumme - Atemnot bekommenKevvere - KäferPlagge - Lappen, auch Fahneuns schleiht der Plagge en -plötzlich ganz betroffen seinsteche - steckenMoor - MauerAapetheater - Affentheaterbovve - obenNüsele - Kleingeldkujeneere - schikanieren

Jetz ben ich ens jespannt, wat vun däm janze Aapethiater op de Door („nachhaltig!“) üvvrich bliev. Op jeden Fall hät et keine Senn, immer op die Andere un op „die do bovve“ zo wade. Jeder muss sich an de eije Nas packe. Un üvver dat Eine müsse mer uns klor sin: Klimawandel koss Jeld un es lästich. Et jeiht uns ahn de Nüsele, ahn de Bequemlichkeite un an de Jewennde.

Un wo mer eimol dobei sin: De Nationaliste, Rassiste un Wotbürjer solle de Schnüss nit esu wick oprieße – wäje dem pulitische Klima. Un de Engländer sollen ehre Brexit en de Tonn kloppe - wäje dem Börsenklima. Un de Chefs sollen ehr Metarbeider nit kujeneere - wäje dem Betriebsklima!