- Annette Schmelter-Lamsfuß, ehemalige Lehrerin, schreibt kölsche Lieder und Texte. ist als Sängerin und Musikerin der Band „Möschtijall“ unterwegs.
- Die Autorin ist eine von sieben Kolumnistinnen und Kolumnisten, die wöchentlich im „Kölner Stadt-Anzeiger“ in einer kölschen Kolumne aktuelle Entwicklungen aufs Korn nehmen.
- In dieser Folge beschäftigt sie sich mit dem Thema Gleisbesetzungen in Köln und der polarisierenden Wutrede von Greta Thunberg.
Köln – Nä, dat wor nix am letzte Wocheengk. Sich op de KVB-Jleise setze, Leeder singe för et Hohn Rose un domet för e Verkehrschaos sorje – als ov dat jet brenge dät för dä Dierschotz. Wann mer en de Jeseechter jeluurt hät vun denne, die am Sonndach ehr Bahn verloße oder em Stau erömhänge mote, wor do vill Ärjer: „Frechheit! Wat soll dä Dress?!“ Schläch för die ärm Biester en der Massedierhaldung.
Su jeit et, wann mer et üvver-driev: de Lück wäde verjrault. Oder se fange an zo räsoneere, ov et de Aktiviste vielleich nor doröm jeit, sich am blöde Res´ vun der Jesellschaff et Mötche zo köhle.
Dat selve Spill neulich bei der Weltklimakonferenz, wo et Zöppchesjriet sing Rondömschängerei loßjeloße hät wäje ehr vermasselte Puutedräum un dem fiese Weetschaffssystem. Un dä böse Politiker ( un eijentlich dä janze äldere Jeneration) et Masseusstirve öm de Ohre jeschlage hät, weil sei zick Johre nix däte wie de Ömwelt versaue un de Junge öm ehr Zokunf bedröje.
Wörterbuch
Hohn Rose - Huhn Rose, Namensgeberin der Tierschutzorganisation „Rose’s Law“üvverdriev - übertreibtMötche kühle - Zorn auslassenJriet - Grete, GretaPuutedräum - Kindertraumewödich - wütendKäuverzäll - Geschwätzov - ob, oderverzänk - zerstrittenloßläje - loslegenmetenein - miteinanderVerdäch - Verträgezohüre - zuhören
Jo un? Meint einer, die Äldere wöte sage: „Stemp janz jenau!“ un dann Äsch op ehre Köpp streue? Em Jäjedeil, wödich wäde die üvver su ene „unjerächte Käuverzäll!“ Un dann kütt allmöhlich su en Stemmung huh wie: „Solle die verwöhnte Blage ehts ens bei sich selvs anfange!“
Su jet künne mer ävver jrad janit bruche.
Su e jefährlich un vertrack Problem wie der Klimawandel kann mer nit völlig verzänk en der Jreff krije, do mösse de Junge zosamme met de Ahle dran arbeide– su wie sei och zosamme demonstreere jejange sin.
Das könnte Sie auch interessieren:
Un wann mer do jesin hät. wievill Minsche längs bejriffe han, dat mer su nit wigger mache künne met unsrem ruinöse Levvensstandard un met der Verkapitaliseerung vun der Nator – ich mein, do künnte mer vörsichtich optimistisch sin. Un dann zosamme loßläje met dem Klimaschotz – ov mer winnijer käuf, flüch oder Auto fäht, ov mer Natorwissenschaffte studeet (statt Medie un Design), ov mer neu bei enem Ömweltverband oder en ener Partei metmät – et es jlich – mer moss nor met Kurasch dobei blieve, ejal, wat die andere mache.
Un schleeßlich sollte mer all ene vernönftije Ömjangston benotze, domet Aktiviste un Nit-Aktiviste un och de Politiker metenein spreche künne - wat se müsse: Üvver Projramme un Jelder un verbindliche Verdräch.Ich hoff jetz op dem Greta sing Dankesred för der Alternative Nobelpreis. Un dat die Jleisbesetzer vielleich ens zohüre.
