Kölsch Kolumne„Veedel schöner Jötterfunke“ – Hommage an einen großen Rheinländer
Autor Michael Hehn
Copyright: Grönert
Köln – 1770. Kölle es ene einzije Sot, en Messkuhl – dreckelig, usselig, erungerjekumme, verjesse vum Ress vun der Welt. Lang vürbei die joldene Zick vum hillije Kölle – meddendrin en riesije Baustell, op der sich zick 250 Johr nix mih deiht. Dat kann mer sich hückzodag janit vürstelle.
Un e Stöck dä Rhing erop litt en kleine Stadt. Voll em Lack met ener prächtijen Residenz un enem Kurföösch. Köln-Sürth-Süd Südliches Veedel. Quasi Bonn. Un jenau do weed em Dezember 1770 ene kleine Fent jebore, dä die Welt ens musikalisch op dä Kopp stelle weed. Nor woss dat do noch keine Minsch.
Mer muss sich dat ens op der Zung zerjonn looße
Dä kleine Ludwig – nä, nit dä Sebus – hatt en schreckliche Kindheit: Vatter hät jesoffe wie en Senk, die Moder wor verzwiefelt un als hä dat all üvverstande hatt, jing hä op Jeheiß vum Föösch als junge Kääl noh Wien, kom noch eimol widder un es beim zweite Mol an der Donau jeblevve, öm do en kooter Zick dä janze Lade opzomesche.
Mer muss sich dat ens op der Zung zerjonn looße: Ene rheinische Jung (et jitt ene Einkaufszeddel vun im, op däm steiht: ½ Hähnschen) medden em Wiener Schmäh. Ohne Etikette, doför met vill Temperament un fingem Humor, Weltbürger, Revulotionär, Liberaler. Un dann fängk hä do an jenau esu en Musik zo schrieve. Wie hä selvs jesaht hät: „Die Musik muss dem Manne Feuer aus dem Busen schlagen!“
Nor ene Doofe kann Musik fähn vun alle Konventione schrieve
Leider woodt dä ärme Kääl langsam doof. För in selvs en Katastroph. För uns e Jlöck: Nor ene Doofe kann Musik fähn vun alle Konventione schrieve, weil dä eijene Kopp kein Jrenze kennt, jetreu singem Bonmot: „Was kümmert mich ihr Geschwätz, wenn der Geist mich überkömmt!“
Die Eroica: Zoeesch singem Vürbeld Napoleon jewidmet, bes dat dä sich die Krun selvs op dä Kopp jesatz hatt.
Das könnte Sie auch interessieren:
Die Mondscheeß-Sonate: Weil hä donoh nit nor dä Bonaparte am leevste op dä Mond jeschosse hät. Für Elise: Dat Orijinal vun „Leev Marie“.
Die Fünfte: En der hä dä Tusch erfunge hatt: Tä-Tä-Täää!
Veedel schöner Jötterfunke
Die Nüngte: 1823 anlässlich vun der Jründung vun Fesskumitee un Rude Funke komponeert: Veedel schöner Jötterfunke. Noh langer Recherche han ich dä Urtext jefunge. He exklusiv em Stadt-Anzeijer, för Metzesinge:
Flittard, Heumar, Gremberg, Lunke – Porz, Wahn, Libur, Düx, Eil, Poll – Humboldt, Rath, Kalk, Bilderstöckchen – Ihrefeld, Bröck un Raderdoll..thal.
Zündorf, Ensen, Sürth, Weiden, Seeberg – Auweiler, Esch, Pesch, Baggerloch – Rondorf, Stammheim, Sülz, Weiß, Urbach – Nippes, Dellbröck, Müngersdorf.
Grengel, Vingst, Niehl, Rudekirche – Ostheim, Neu-Bröck, Meschenich – Roggendorf, Thenhoven, Weiler – Junkersdorf, Riehl, Lövenich.
Weidenpesch, Rheinkassel, Langel – Worringe, Zollstock, Mengenich – Nor he Fühlinge mer Kölsche uns zo Hus, dat Merkenich!