Kölsch-KolumneBröder em Nevvel – Walter Oepen op kölsch
Autor Walter Oepen
Copyright: Matthias Heinekamp
Köln – Es jetz es vun däm Kadenal Meißner en Erinnerung jeblevve, dat hä en Kölle nit jot jeledde wor, ävver de Kölsche ärch unger ihm jeledde han. Hat unse fröhere Äzebischof en singer Amps- un Levvenszick eintlich Fründe? Vill künnen et usser dem polnische Paps nit jewäse sin. Unse kölsche Hofnarr, der Beckers Jürgen, hät domols en singer Prädich en der Stunksitzung de klorste Wööt jefunge.
Ävver wä hätt jedaach, dat hä op singe schlächte Rof posthum noch eine dropsetz? Op singe jeheime Akteodener, en däm hä de Fähltredde vun singe klerikale Anjestellte verstoche hat, hät hä „Brüder im Nebel“ jeschrevve. Dat es em Bleck op die ärm Pänz, die zo Offere woote, natörlich en unverschämte Verniedlichung för die Paafe, die met dem Zölibat nit klorkome, ehr sexewelle Triebe nit em Jreff hatte un sich an unschöldije Puute verjreffe han. Ävver wat hät hä met däm „Nebel“ jemeint? Die Nevvelkääze, die de katholische Kirch jeschmesse hät, domet sich de Täter dohinger versteche kunnte?
Die Moral zum Teufel gejagt
Udder dä Nevvel, dä et Zölibat em Jeheens vun denne schwatze Schoofe Joddes anjereech hät un dä se hät verjesse loße, dat se de katholische Moral nohm Düvel jage?Ävver mer han en Kölle jenoch Lück, op die „Bröder em Nevvel“ besser pass. Do es för e Beispill däm Meißner singe Nohfoljer, dä Woelki, dä wie et schingk och op enem Wölkche schwäf. Dä hät sich doch tatsächlich bei singe Jläubije doför entschöldich, dat hä us alle Ecke kritiseet woden es! Un jetz meint hä, dat hä durch dat vun ihm bezahlte Jotachte us allem Schlamassel erus es! Vör langer Zick han ich ens dä Leedtext he jeschrevve: Zwei Priester lävden em Zölibat. Dä ein, dä wood Bischof, dä andre Prälat. Dä Prälat, dä drevv et met Kindere, dä Bischof dät et nit verhindere!
Wörterbuch
jeledde - gelittenverstoche hat - versteckt hatteOffere - OpferPaafe - PfaffenJeheens - Gehirn, Verstanddrevv - Vergangenheit von drieve: triebLälbeck -Grünschnabel, Flegel
Bröder em Nevvel woren och die Lück vun de städtische Bühne, die e paar Milliöncher bei ener domols ald waggelije Bank anjelaht han. Un die sin jetz fottü. Dobei hädden ald bei däm Name sämplije Alarmjlocke lügge müsse: „GreensILL“! Die Bank wor krank!
Schwer benebelte Jusos
Schwer benevvelt müssen och de kölsche Jusos jewäse sin, die widder ens noch bessere Minsche wie mer andere sin wollte. Op de Rassismus-Debatte, die derwiel mänch jrelle Blöte driev, han se noch e Vijülche dropjesatz: Name un Kostüme vun mänche Fastelovends-Klübcher wöre „rassisitisch“ un „diskriminierend“, dat wör „Aneignung und Vereinnahmung fremder Kulturen“.
Das könnte Sie auch interessieren:
Als Ihrefelder Zigeuner, Indianer oder Asiate zo jon, dat jing janit. Ävver do hät sich der ahle Wirges, der langjöhrije Bezirksboss vum Ihrefeld, sing Partei-Lällbecke ens vörjeknöpp un inne der Kopp zoräch jesatz. Jot esu, soll hä doch tireck beim Woelki un beim Wasserfuhr wiggermaache! Domet sich nit noch mih Nevvel üvver uns Stadt läht und der Bleck för et Richtije un Nutwendije dröv.