Michael Hehn op kölschDä Husahz kämpf an vorderster Front
Michael Hehn
Copyright: Grönert
Köln – En solche Zigge wie hückzodch weed mer immer mih Saache jewahr, die mer esu vielleich vürher jarnit wahrjenomme hät, weil se a.) nit esu wichtig wore, oder weil et se b.) nit jov. Zom Beispill esu ene schäbbije, spackije jääle Lappe met Opkläver dren, dä söns immer en der Schublad vom Schrievdesch verstöbb es: Dä Impfpass. Jitz dat Dokument Nummer eins – noch vür dä Jebordsurkund.
Oder e ne Püngel vull Minsche, die jedöldig vür'm Supermaat waad för ene freie Enkaufswage oder e Körvje: En Schlang! Die jov et doch söns nor domols en der Tätärä, wann et em HO Banane jov. Oder dat Tänzche, wat maskeerte Lück op der Stroß opföhre, öm sich bloß nit nöher zo kumme als eine Reker (en Ärmläng). Oder besser noch eine Lauterbach (dat entsprich drei Reker). Oder die Lück, die en der Pflege arbeide, die sich dä Hingersch oprieße för andere un för e unverschämp klein Jehalt. Oder: Dä Husahz.
Universelle Allzweckwaffe
Dä Husahz es en der Evolution vun dä Ähzte esu ahl wie ene Ginkobaum un dobei esu modän wie en Züchtung vun schwatz-jääle Tomate. Hä es somet die universelle Allzweckwaffe vun der Medizing. Dobei jitt et vill Zohte vu n Ähzte: Ene Orthopäde loort noh dä Knöchelcher un ränk uns en, bes dä janze Balg am knacke es.
Wörterbuch
verstöbbe - verstaubenHingersch - HinternPüngel - Haufen, BündelZohte - Sorten, Artenop de Schwaad krije - Prügel bekommenloore - schauenmallich - jeder einzelnejömere - jammernjuhze - jubeln
Ene Onkologe widderöm mööch mer en singem Levve nit kenneliere, zomindest beroflich. Vun enem Anästhesiste kritt mer nit vill met, jenau esu wie vun enem Chirurg, wann dä Anästhesist öndtlich jearbeid hät. Kritt mer vun däm Chirurg jet met, kritt dä Anästhesist vun einem jet met. Un zwar op die Schwaad! Ene HNO-Ahz loort einem en et Jeseech un ene Proktologe wigger ungen hingen eren. Ävver dä Husahz! Dä kann quasi alles!
Dä kämpf an vorderster Front: Dä kennt sing Patiente. Dä es Kummerkaste, Therapeut, Sielsorjer un Fründ. Hä deiht dä janzen Dag all die Kühmereie met stoischer Rauh erdrage. Hä es dä Balsam för die Siel, et Hätz un dä Balg. Minge Balsam heiß Dokter Dresch . Un allein, wann mer zosamme Kölsch spreche, jeiht et mir ald widder besser.
Juhze statt Jömere
Jitz dürfe die Huhsähz einem endlich och die Spretz en dä Ärm setze. Un wat passeert?
Mallich fängk an zo lamenteere un zo jömere, et Chaos däht üvver uns eren breche, anstatt zo juhze, dat endlich ens Tempo en dä lahme Apparat kütt, domet mer uns bahl widder en de Ärm lijje künne.
Das könnte Sie auch interessieren:
Ich frogen mich iher: Woröm hät dat esu lang jedoort, dat mer op die Idee jekumme es, die universelle Allzweckwaffe enzosetze em Kampf jäje dat dreckelije Dressvirus? Mer muss nit alles verston. Wat ich ävver verstande han es, wie wichtig ene jode Husahz es. Dä minge kritt dämnächs en Fläschelche jode Wing!