Arno Steffen op KölschHaupsaach, mer kriejje dä Drissvirus us unserem Levve fott
Unser Kolumnist Arno Steffen
Copyright: Matthias Heinekamp
Köln – Nä, wat ess dat schön! E Jlöcksjeföhl, dat mer widder ens su komplett affhevve un e Stöckche üvver die Äad schwevve künne! Ich hann ene Impftermin! Ofschüns ich Risikojrupp ben un ziemlich lang jewaat han, schwevve ich. Dä Impftermin es zwar nit met mingem Wunschmeddel, ävver dat es jenau su ejal wie beim Pänzkrijje! Dä Nome klingk zwar wie e Jemölsch us däm Hamburger Jebräu un enem stoische Philosoph – ävver ejal – wat muss, dat muss. Haupsaach, mer kriejje dä Drissvirus us unserem Levve fott.
Meckern in geschlossenen Räumen ist gefährlich
Jot, dat jründliche Wäsche vun dä Extremitäte sullt mer vielleich beibehahle. Dat kammer ahn dä andere Infektione merke, dat dat helf. Och dat Fleeje un dat Autofahre künnte mer esu wiggermaache, wie mer dat en dr Pandemie jemat han – uns Klimabilanz weiß dat jenau.
Ahnt Drare vun dä Maske hät mer sich och e beßje jewent: Monochrome Fastelovend em Alldaach. Jetz han se erus jefunge, dat dat Kölsch Drinke un Laache op dr Strooß janit esu schlemm es wie jedaach. Ich jläuv, dat Jejöhmere en jeschlossene Räum es vell schlemmer.
Dä janze Daach om Balkon ston un klatsche
Ach nä! Doh künnt mer joh dä janze Daach om Balkon ston un klatsche...un nit nur för de Krankeschwestere, die mer beim bessere Bezahle leider verjesse han. Nä, ens als Dank ahn dat janze Schmölzje, an all de Minsche, die ohne Murre Lockdown noh Lockdown akzeptiert han, die dat janze Politchaos en Vernunf ömjewandelt han. Jot, mer darf och murre. Sicher.
Das könnte Sie auch interessieren:
Et jit joh och welche, die alles ömwandele wulle un die sich ahn nix halde. Jov et eijentlich immer! Die leuchne dä Corona einfach un sare, dä jööv et üvverhaup nit! Doh künnte de Intensiv-statione doch ens kleine Besuchertoure för uns Querdenker maache.
Wörterbuch
ofschüns - obwohlJemölsch - Gemischjewent - gewöhntJejöhmere - GejammerSchmölzje - Gruppe, Sippeleuchne - leugnenÄäd - ErdeNohbarspänz - Nachbarkindersöke - suchen
Nix jäje Querdenker – ich denk selver quer. Ävver beklopp ben ich deshalb nit! Jläuvt mer: De Ääd es kein Schiev! Bill Gates deit nit de Lück impfe! Ich kenne keiner, dä Blotserum vun dä Nohbarspänz koch. Ich han keine Chip kräje – oder han et nit jemerk. Wenn üvverhaup - ben ich naturtrüb – fröher ens en dä Kölschkessel jefalle...
Ävver eins kann ich üch sare: Sobald he widder Land en Sicht es, un wemmer sich widder normal bewäje kann, söke ich mer e paar Fründe un Fründenne ( ich wöß och schon wä... ) un wäde ens widder ödentlich dä Larry mache! Bes dohin: Freut üch, lot üch nit verdriesse un dank’ all denne vun Hätze, die et jot maache. Klatschmarsch, Larry!