Nach der Rettung des 1.FC KölnJedanke em „Kölner Keller“
Autor Walter Oepen
Copyright: Matthias Heinekamp
Köln – Wann mich einer fröch: „Bes do FC-Fan?“, dann sagen ich: „Ich ben Foßball-Fan un Kölsche, alsu muss ich met däm Verein levve!“ Wat ich op keine Fall ben, es Masochist, un met der Fan-Romantik kann ich suwiesu nix mih anfange. Die pass eifach nit mih zo däm knallhade un opjeblose Millione-Jeschäff, zo däm der Foßball jewoden es. Trotzdäm dät et der kölsche Patriote-Siel natörlich wih, dat unse Fahrstohl-Club nor noch em „Kölner Keller“ spillt, un mer mäht sich sing Jedanke, woröm mer vun Clubs wie Union Berlin un Mainz 05 avjehängk wäde. För einer vun drusse es et immer leich, de Lappe zo schwade, ävver dat dun se derwiel all en Kölle. He laufen dausende Franz Kremers eröm, deswäje jevven och ich he minge Mostert dobei.
Friedhelm Funkel lag daneben
Zoeesch ens: Ich han dä Endruck, dat am Jeißbockheim zovill Lück metbestemme, die meine, se wöre em Besetz vun der einzije Wohrheit, die nit dozo fähich sin, sich en der Saach zo fäje, ävver dann för et Wohl vum Verein zosamme jode Lösunge zo finge. Dat es nit der „Zeitgeist“, wie der jetz hellich jesproche Friedhelm Funkel scharf donevve jetroffe hät, ävver der „Geist des Hauses“, udder wie de ahl Latriner sage: „Genius Loci“!
Schläch Vörbeld wor dä Overath. Ald domols op dem Spillfeld wollt dä jede Ball noh vürre han. Un wie hä Präsident wood, saht hä: „Alles üvver minge Schrievdesch!“ Nor dat hä dann selden am Schreivdesch soß. Un dann jing et widder der Baach erav. Zickdäm schingk et mer, als leefe do luuter klein Overaths eröm, die sich üvver jede Dress en de Woll krije: Schmadtke jäje Stöger, Ritterbach jäje Spinner, Veh jäje Müller-Römer, Müller-Römer jäjen alle, Mitjlieder-Rot jäje Jeschäffsführung un Vörstand. Kann mer sich dojäje impfe loße? Met Anti-Egozentrica?
Das könnte Sie auch interessieren:
Un wat der Vörstand anjeiht: Wochelang hät mer vun denne nix jesin un jehoot. Dä Funkel han se noch nit ens persönlich bejröß. Un jetz schmieß dat Jemölsch-Gremium us Vörstand un Mitglieder-Rot der Heldt erus, dä bei däm Häufje Nüsele, dat hä en der Hand hat, och kein Transfer-Kning us dem Hoot zaubere kunnt. Ävver dä Mann hät söns ene jode Job jemaht un hä hät Hätzbloot för der Verein un es nit su en Lackaap wie dä Veh.
Ein verirrter Wolf
Dä Ruswurf wör „Populismus“, hät inne der Spielerberater Volker Struth en et Stammboch jeschrevve. Dä Mann hät ne Püngel Ahnung vum Jeschäff. Dä meint, dat mer ohne Investor hückzedachs nit methalde künnt. Mer möht ävver su en Jeldjevver finge, die der Jeschäffsführung nit en alles erenschwade. Un ene jode Präsident, dä en de hüggije Zick pass, bröht ene jroße Werkzüchkaste vun Fähigkeite un möht dem Verein en der Öffentlichkeit e Jeseech jevve: He kütt der Boss! Em Mumang erinnert mich dä Präsident an dä Wolf met vier Bein, dä neulich em Düstere durch Kölle jesträuv es un sich dann flöck widder durch de Koot jemaht hät. Wann dä zweibeinije Wolf nor em „Kölner Keller“ wirk und dä Werkzüchkaste nit hät, dann soll hä sich wie singe Namensvetter op vier Bein och dönn mache.
Vielleich hät dä Struth Räch domet, dat et ohne Investor nit jeiht und dat de „Demokratisierung“ vum Verein en de Botz jejangen es. Dat es bitter, ävver vielleich müsse mer uns entscheide: Investore udder drette Lija. Ohne Marie läuf nix mih! Söns müsse se dämnöhks ehr Stars met Kölsch-Deputat bezahle. Udder met Bitburjer us dem Wolf singem fröhere Lade. Alsu: Wo es dä Held(t), dä vun singem Jeld noch e Ründche bestellt? Und dä Präsident met däm Werkzüchkaste? Domet der Verein widder „funkelt“, domet et us dem Keller en de bövverschte Etasch jeiht un et widder heiße kann: Tausend Frauen – eine Liebe: 1. FC KÖLN!
Wörterbuch
de Lappe schwade - viel redenFranz Kremer - unvergessener Präsident (1948-1967), der aus dem FC einen Spitzenclub machtezoeesch - zuerstfäje - fegen, streitenald - schonJemölsch - GemengeKning - KaninchenLackaap - Lackaffedurch de Koot mache - abhauenbövverschte - oberste