Walter Oepen schreibt „op Kölsch“Dateschutz als Alibi för et Vertusche vun Skandale
Autor Walter Oepen
Copyright: Matthias Heinekamp
- „Oepens Schmal“ ist einer der Autoren, die wöchentlich im „Kölner Stadt-Anzeiger“ Texte für die kölsche Kolumne „loss jonn“ schreiben.
- In dieser Folge schreibt er über ein Gutachten, das die Stadt unter Verschluss hält, das den Messe-Skandal gar nicht so skandalös findet.
Köln – Vör e paar Woche han ich jet üvver „Datenschutz“ jeschrevve un wor esu frech zo behaupte: Dateschutz es för de Katz! Ävver jetz hät dat Thema noch ene janz andere Drih kräje: Dateschutz als Alibi för et Vertusche vun Skandale! Un wä hät dat jefriemelt? Natörlich uns dolle kölsche Stadtverwaltung!
Vör drei Johr hatte widderböschtije Stadtverordnete verlangk, dä Skandal öm dä Bau vun de neu Messehalle us dem Johr 2003 möht noch ens öhntlich ungersöhk wäde, domet de Kölsche jenau jewahr wäde künnte, wat do jeklüngelt wode wor. Jesaht, jedon: Ne Jotachter kräch dä Opdrach un maht sich an de Arbeit. Ävver wie dä jetz fädich wor, meinte de Stadtkämmerin: Dat dürfe mer nit veröffentliche, do wäde „die Persönlichkeitsrechte der Beteiligten verletzt“! Do wor ävver jet mangs em Rothuus!
Zur Person
Walter Oepen ist Autor, Liedermacher, Kabarettist und Musiker, unter anderem im Krätzjer-Duo „Quetsch un Flitsch“. Gerade erschien die neue CD „He kütt de Kölsch-Pulezei“. 30 Jahre lang arbeitete Oepen als Puppenspieler im Hänneschen-Theater. „Oepens Schmal“ ist einer der Autoren, die wöchentlich im „Kölner Stadt-Anzeiger“ Texte für die kölsche Kolumne„Loss jonn“ schreiben. (fra)
Avjesin vun der Unverschämpheit stellte sich die Froch, wat et do üvverhaup noch zo verletze jov? Stunt doch domols alles en der Zeidung! Och die Haup-Klüngelbröder, die der Stadt dat fuule Ei en et Ness jelaht hatte, wore bekannt: Gustav Adolf von Schweden, Chef vun der Stadtsparkass, un Jupp Cash met singem Oppenheim-Cash-Fonds, dä et vum Mörer zom Rendite-Jongleur jebraht hat (beidse he unger Pseudonym, wäje de Persönlichkeitsrächte!). Woröm alsu dä janze Buhei?
Jotachte för 116000 Euro Honorar
Ävver et kütt noch schlemmer: Noh e paar Däch muss ich he en der Zeidung lese, wat dä schlaue Jotachter us Kiel för 116000 Euro Honorar erusjefunge hät: Alles prima, nix passeet! Hä süht „…trotz kritischer Prozessabläufe… erheblichen Erfolg…“ un „ein eher positives Gesamtbild“ un meint, et hädden sich „…Gelegenheitsfenster ergeben, die für alle Beteiligten solche Gewinne versprechen, dass die Akteure bereit sind, die Grauzonen legalen und legitimen Handels zu betreten.“
Wörterbuch
kräje - gekriegt, bekommenjefriemelt - hingefummeltwidderböschtige - widerborstigejet mags sin - viel los seinjelaht - gelegtMörer - Maurerrächswidderrich - rechtwidrigald - schonKreppche - Begebenheit, Geschichte, Krippenspielhückzodachs - heutzutage
Wat? Wie jetz? Hallo? Es dat dressejal, dat der Europäische Jereechshoff 2009 dä janze Klüngel för rächswiddrich erklärt hät un alles zoröck avjeweckelt wäde moht? Un dat mer Stüerzahler do met 57 Millione dobei sin? Un dä Jeseechsverlus för Kölle? Vun wäje „Grauzone“, die wore em rude Bereich! Ävver wat jöck uns et europäische Räch!? Mer sin Planet Kölle, wann de em Universum erenküss, de zweite Jalaxie räächs!
Das könnte Sie auch interessieren:
Ich hatt mich ald domols fies opjeräch, wie der Rejierungspräsident dat Kreppche „eine pfiffige Sache“ un „äußerst geschickte Konstruktion“ jenannt hatt. Un jetz dat Jotachte vun ener Kieler Sprott! Dat zeich doch widder ens, dat mer sich hückzodachs för jenoch Nüsele jedes Jotachte kaufe kann, dat mer han well. Et einzije, wat jetz dobei erusjekummen es, sin neu Definitione för dä Bejreff „Klüngel“ und dat mer jetz wesse, woröm de Kölnmesse die fuul Eier em Logo hät!