Meine RegionMeine Artikel
AboAbonnieren

Walter Oepen schreibt „op Kölsch“„Dat Date dat dürfe!“

Lesezeit 3 Minuten
Neuer Inhalt

Autor Walter Oepen

Copyright: Matthias Heinekamp

  1. Walter Oepen ist Autor, Liedermacher, Kabarettist und Musiker, unter anderem im Krätzjer-Duo „Quetsch un Flitsch“. Gerade erschien die neue CD „He kütt de Kölsch-Pulezei“. 30 Jahre lang arbeitete Oepen als Puppenspieler im Hänneschen-Theater.
  2. „Oepens Schmal“ ist einer der Autoren, die wöchentlich im „Kölner Stadt-Anzeiger“ Texte für die kölsche Kolumne „loss jonn“ schreiben.
  3. In dieser Folge beschäftigt er sich mit dem Datenschutz. War in Oepens Jugend nicht die alte Leyendecker die Mutter all der Superrechner, die unsere Daten aufsaugen?

Köln – De Date halden uns janz nett op Trapp! Dürfe Date dat dann? Dat Date dat dürfe! Jot, ich well och nit, dat jeder alles vun mer weiß, sulang ich et ihm nit an der Thek verzallt han.

Alsu: Dateschutz jäje Dateklau! Ävver wann su en Büro-Krat die Saach en de Fingere krit för e Jesetz zo maache, dann weed dodrus tireck e Bürokratie-Monster. Ejal wo, beim Dokter, bei der Bank, mer muss jetz siggelange Formulare ungerschrieve, die sich suwiesu keiner durchlis. Wann et Klassenfoto en der Schullzeidung avjedruck wäde soll, müsse de Eldere ehr Enverständnis jevve. Beim Dokter darf de Sprechstundehölp de Patiente nit mih met Name oprofe; ävver wat soll se maache? „Das Magengeschwür bitte in Raum 3“?

Wörterbuch

tireck - direktsiggelang - seitenlanddurchlis - durchliestEldere - ElternSprechstundehölp - SprechstundenhilfePooschte - BurschenNoss - NussStöbbsauger - Staubsaugerrieven - reibenloch - lagwoss - wusstewigger - weiteropsöggele - aufsaugen

Trotz all däm jit et üvverall Datelecks. Leck mich en der Täsch! Stunnt doch neulich en der Zeidung, dat persönliche Jesundheitsdate för jederein em Internet zojänglich wore! Ich well doch nit, dat su ene Kraxlhuber en München weiß, dat ich Hämorrhoide han! Dä weiß och janit, wie mer dat schriev!

En rumänische Kellere und russische Datschas setz en Armee vun Hacker un die Pooschte sin ärch jot drop: se hacke un knacke ding PIN un TAN wie en doof Noss! Wie Angler fesche se sich us dem jroße Date-Meer alles, wat se welle. Klore Fall vun Üvverfischung! Un dann die Ami-Spione vun der NSA! Han durch decke Kabele em Atlantik alles us de E-mails un asoziale Netzwerke erusjekratz, wat se meinte bruche zo künne.

Dann jit et do noch dä Finanzgigant Blackrock. Dä hät en de USA jewaltije Rechner met däm Projramm „Aladin“ stonn, dat wie ene Stöbbsauger alles opsöggelt, wat mer vielleich bruche künnt för met ander Lücks Jeld zo jongleere. Die rieven an der Wunderlamp, un Aladin speit Date us dausend un einer Naach us.

Das könnte Sie auch interessieren:

Fröher maat dat bei uns en der Stroß die ahl Leyendeckers, die der janze Dach em Finster loch. Die woss och alles vun jedem, och vun minge Hämorrhoide. Dat wor suzesage de Mamm vun all dene Superrechner. Alsu wann ehr mich frocht: Dateschutz es för de Katz!

Su, jetz muss ich ävver Schluss maache, ich han noch e „Date“, wie mer op neukölsch säht. Ävver vörher ungerschrievt ehr mer noch all en Erklärung, dat ehr nit wigger saht, dat ich Hämorrhoide han!