Köln – Wat ich am Hervs esu richtig jot ligge kann, usser freschem Wind un Blätterjeraschels unger de Fööss, es Öllichtart un Moss. Dat es herrlich! Dat es vegetarisch. Un dat es regional. Un en jeder klein Weetschaff an dr Eck op dr Fooderkaat.
Esu einfach kann et Levve sin! Superfood op kölsch. Ich muss nit lang üvver Chiasamen un Jackfruit schwade, die öm dr halve Jlobus erüm jetrocke sin, bevür se do op mingem Teller lande.
Ov Höhnerbein, die ussinn wie Höhnerbein, ävver jar kin Höhnerbein sin - ov Rüjewalder Levverwoosch em Plastikschächtelche janz ohn Levver un janz ohn Woosch... die han doch ene Hau! Dat bruch kei Minsch. Dä Öllich wähß hingern Huus em Jaade un dä Moss kütt vum Stadtwinzer tirek vür dr Döör.
Das könnte Sie auch interessieren:
Mir perönlich bliev ald lang de Flönz do stecke, wo Liev un Kopp zesamme halde. Wenn do sühst, us wat för ner ärm’ Sau die gemaht woode es, krisst do dat Zeug nimmieh eraf. Dojäje es dä neuste Zombiefilm e Pläsierche för dä Kinderjebootsdach! Ävver ich loss mer vun dä Nahrungsmeddelindustrie doch nit dä nökste Quatsch andriehe. Jedereine, bei däm sich de Murmele noh driehe, muss sech doch sage: Nä, Lück, nit met mir! Friss dinge Dress allein!
Do bruchs do nit jlich schäler Kopp för mich ze sage. Jedem Jeck jefällt sing’ Mötzje, ävver Himmel un Ääd schmeck' och ohne Woosch. Dat bedück op keine Fall, dat de jode ahle Huusmannskoss us dr Mod' jerode es. Janz em Jäjedeil.
Loss mer widder zur Räsong kumme un loore, wat uns Mamm jekoch hätt. Suurbrode jov et, wenn et huh kom, einmol em Johr. Un dann hatt et Veedel en ahl Kutschpääd winnijer...
Wörterbuch
Öllichtart – ZwiebelkuchenMoss – MostFooderkaat – SpeisekarteLevverwoosch – LeberwurstPläsierche – kleines Vergnügennökste – nächsteFleutekies – QuarkkäseKrote – Karottensuure Kappes – SauerkrautÄädäppel – KartoffelnVerwendschnettche – Süßspeise wie „Arme Ritter“Kuschteie – Kastanien
Ävver an dä andere Däch em Johr jov et Öllichtart. Ov Pannekoche met Pelze, Quallmänner un Fleutekies, Rievkooche met Appelmus, Krote un Äädäppel, suure Kappes, Ähzezupp... All dat müsse mer wedder dekuvriere. Dat es de neue Exotik. Un för Fortjeschrittene: Verwendschnettche, Kuschteiepastet, Hummus un av un zo Fritte ruut-wieß... natörlich ohne dat fiese Palmöl!
Dann flupp dat. Met mingem Jewisse, met mingem Jewicht un met mingem CO2-Foodprint.
Zur Person
Marina Barth ist die Chefin des Theaters „Klüngelpütz“ in der Gertrudenstraße. Im Programm „Köln (nicht nur) für Anfänger“ bietet sie eine „Überlebenshilfe für Kölnbesucher und Zugereiste. Im Oktober stehen mehrere Aufführungen auf dem Spielplan. Die Kabarettistin, Regisseurin und Stadtführerin ist eine von sieben Autoren, die wöchentlich Texte für unsere Kolumne schreiben. (fra)
